أخبار ومواضيع راديو مظبوط
December 24, 2017

انت مين؟! ( اكتشف نفسك )

بقلم : ليلى فرج

انت مين؟! ( اكتشف نفسك )

بتقعد مع نفسك قد ايه ؟؟ شايفك ياللي بتضحك عليا هناك
يا عم مش بهزر بسألك فعلا يعني عارف نفسك ولا لا ؟؟
يعني مثلا عارف اللي بيفرحك واللي بيزعلك واللي نفسك فيه
واللي حابب تغيره فيك علشان مش عاجبك او مثلا يعني اللي حابه فيك وهاتطوره ؟؟
هاه لسة بتتريق عليا ؟؟ ولا حاسس نفسك مش عارفها قوي
طيب استنى هاقولك اكتر انك بتظلمها ومش عارفها كويس
ف 2 اشخاص اسمهم جو و هاري عملوا زي شباك بيقول ان شخصيتك متكونه من 4 اجزاء
اول جزء منه هو ان فيا حاجات انا عارفها عني والناس برضه عارفاها عني حلو كدة ؟؟
الجزء التاني انا عارفه بس الناس مش عارفاه ممكن تكون حاجة عارفها عني بس مخبيها
مش شرط سر يا عم علشان عارف دماغك راحت بعيد بس حاجة بتداريها
زي كسوفك مثلا او غضبك شوية

الجزء التالت اسمه المنطقة العمياء ( يا ساتر يارب ) استني يا عم ماتتخضش
دي بتبقي بقي ان في حاجات فيا انا مش شايفها بس الناس حوليا شايفينها
علشان هي واضحالهم زي مثلا.. ممكن تكون فيا ميزة انا مش شايفها بس الناس شايفاها .. علي فكرة صدقهم بقي
والحتة الاخيرة اسمها المجهولة اللي ماحدش عارفها ولا انا ولا الناس
وبعدين بقي في شغل العفاريت دة ؟؟
ماهو لما انا مش شايفها ولا الناس شايفينها امال عرفتها منين سعادتك ؟؟
اقولك انا دي حاجة كدة بتكون مستخبية وبتظهر مثلا مع الوقت او لما تيجي فرصتها
زي مثلا موهبة جواك وبتتعرف بقي لما انت بتتحط في خبرات
الشخصية الكويسة بقي اللي هي سوية بتظهر لما المنطقة المفتوحة
اللي هي انا والناس عارفينيها دي تزيد اللي هي اول منطقة
المنطقة دي تزيد ازاى بقي ؟؟ اقولك برضو
لما المنطقة العمياء اللي فيها الناس شايفني دي توسع
يعني اسمحلهم ( مش كل الناس هاه ) يقولولي علي اللي فيا انا مش عارفه
توسعها ازاى بقي المنطقة دي
1 – اسمع عنك كتير من ناس تثق فيهم اسمحلهم يساعدوك تعرفك ( تعرف نفسك يعني )
2 – شجع نفسك تدخل خبرات تكتشف فيها حاجات من المنطقة المجهولة فاتعرفك برضو اكتر واكتر